Ofvirkni:
Líkamshreyfingar
bætast við athyglisbrestinn

Þegar ofvirkni fylgir athyglisbresti skapast meiri vandi hjá barninu þannig að líklegt er að barnið verði sent í greiningu og síðan lyfjameðferð, oftast á Ritalin. Ofvirkni felst einfaldlega í því að líkamshreyfingar bætast við athyglisbrestinn.

Líkamleg áhrif skynvillu
Oftast er ofvirknistimpillinn settur á lesblinda nemendur vegna líkamlegra áhrifa skynvillu. Flestallir nemendur fyllast leiða og eiga í baráttu við að halda sér vakandi þegar þeir missa áhuga á námsefninu eða átta sig ekki á því. Lesblindir verða skynvilltir í ofanálag.

Orsakir ofvirkni
Auðvelt er að átta sig á orsökum ofvirkni ef hún er skoðuð frá eftirfarandi sjónarhóli: Í upphafi hefur nemandinn ekki áhuga á því sem er að gerast eða skilur ekki hvað kennarinn er að segja. Leiðinn og ringlið, sem fylgir þessu, örva skynbjögunareiginleika nemandans og hann verður skynvilltur. Á meðan hann er leiður, ringlaður og þar af leiðandi skynvilltur flýtir innri klukkan sér og ytri tíminn virðist hægja á sér. Fyrir hverja raunverulega mínútu sem líður verður þessi nemandi að halda út í tvær mínútur við að koma sér ekki í vandræði, halda athygli, einbeita sér eða sitja kyrr.

Bjöguð skynjun
Skilningarvit nemandans eru bjöguð, þar með talin skynfæri jafnvægis og hreyfingar. Jafnvægis- og hreyfiskynfærin skynja einungis tvennt. Annað hvort er maður kyrr eða maður er áhreyfingu. Annað hvort er maður í jafnvægi eða ekki í jafnvægi. Sitji nemandinn kyrr þegar bjögunin hefst finnst honum hann vera á hreyfingu. Sitji hann kyrr nógu lengi verður hann bílveikur. Ef hann fer að hreyfa sig virkar það sem mótvægi við hreyfitilfinninguna og honum finnst hann vera kyrr. Þessi öfugsnúningur veldur því að nemandinn fer að hreyfa sig, til að losna við bílveikina og flökurleikann og koma þannig í veg fyrir að hann kasti upp. Öfugsnúningurinn gæti líka verið ástæða þess að Ritalín, sem er örvandi lyf, virðist virka öfugt og hægja á ofvirkum.  Það er skynbjögun sem veldur þessari óþægilegu upplifun hreyfingar. Þess vegna magnast hjá nemandanum hreyfitilfinningin í hvert sinn sem honum er sagt að sitja kyrr. Stafar það af því að skynjanir fyrir jafnvægi og hreyfingu eru öfugsnúnar.

Að læra skynstillingu
Gæti nemandinn lært skynstillingu slökknar á þeirri starfsemi heilans, sem hefur bjögun skynjana í för með sér. Hann gæti skynjað umhverfið á raunsannan hátt. Þörfin fyrir hreyfingu til að bæta upp hið bjagaða jafnvægisskyn og hreyfiskyn mundi hverfa. Skynstilling kemur í veg fyrir skynvillueinkennin en getur aldrei kveikt áhuga á illa kenndu námsefni. Það er umhugsunarefni að afburðagóðir kennarar hafa sjaldan nemendur með athyglisbrest í tímum hjá sér, jafnvel þótt þar megi finna nemendur sem eru stimplaðir sem slíkir í öðrum tímum.

Aðalsíða