Valgerður Snæland Jónsdóttir

Valgerður Snæland Jónsdóttir, M.Phil.,
hlaut alþjóðleg réttindi sem Davis® ráðgjafi 29. júní 2004

Valgerður er fædd, um miðja síðustu öld (1950), á Skarði, í Bjarnafirði, Kaldrananeshreppi, Strandasýslu. Hún fluttist með fjölskyldu sinni að Svarfhóli í Borgarfirði 1952, til Ytri-Njarðvíkur 1954 og í Kópavoginn 1963, þar sem hún hefur búið síðan.

Menntun
Hún lauk barnaprófi frá Barnaskóla Ytri-Njarðvíkur 1963, unglingaprófi frá Gagnfræðaskólanum í Kópavogi 1965 og gagnfræðaprófi frá sama skóla 1967. Valgerður lauk kennaraprófi frá Kennaraskóla Íslands 1971, stúdentsprófi 1972 og framhaldsnámi í sérkennslu 1974. Hún lauk B.A. námi í sérkennslufræðum frá Kennaraháskóla Íslands 1987 og M.Phil. námi frá University of Northumbria á Englandi 1995, með áherslu á skólanámskrárgerð, skólaþróunarfræði, menntunar- og skólastjórnun.

Starfsréttindi
Valgerður er með réttindi sem sérkennari, grunnskólakennari og framhaldsskólakennari. Hún er með alþjóðleg réttindi sem Davis® ráðgjafi.

Starfsferill
Valgerður á langan og farsælan starfsferil í menntakerfinu. Hún hóf kennslustörf 1972 við Digranesskóla í Kópavogi og við Upptökuheimili Ríkisins sem þá var staðsett á Kópavogsbraut. Þetta var fyrsta starfsár Upptökuheimilins sem síðar var nefnt Unglingaheimili.

Eftir að Valgerður lauk sérkennaranámi gerðist hún sérkennari við Kársnesskóla og Þinghólsskóla í Kópavogi. Hún starfaði sem sérkennslufulltrúi hjá Helga Jónassyni, fræðslustjóra, á Fræðsluskrifstofu Reykjanesumdæmis, 1980 - 1994. Um tíma - í rektorstíð Jónasar Pálssonar, sálfræðings - starfaði hún í hlutastarfi, sem lektor við Kennaraháskóla Íslands, að uppbyggingu náms í sérkennslufræðum. Hún skrifaði m.a. námskrá fyrir starfsleikninám (professional skills) fyrir kennara í almennum grunnskólum ásamt Keith Humphreys, M.Phil., frá Englandi, gistilektor á þeim tíma við KHÍ. Í starfi sínu við Kennaraháskólann stjórnaði hún fyrsta starfsleiknináminu sem haldið var fyrir kennara í almennum grunnskólum. Valgerður hefur starfað sem skólastjóri við Smáraskóla í Kópavogi frá stofnun hans 1994.

Valgerður var skipuð varamaður í stjórn Blindrabókasafnsins frá stofnun þess 1982 til 1988; hún átti sæti í starfshópi á vegum European Association of Special Education um tölvur í sérkennslu og sat í starfshópi á vegum Námsgagnastofnunar um útgáfu sérkennslugagna (1983-1990).

Valgerður hefur leitt ýmis þróunarverkefni s.s. um skólanámskrárgerð, um byrjendakennslu, um heildaraðferð í lestri (Jörgen Frost) og um nýjar áherslur í stærðfræðinámi í samvinnu við Önnu Kristjánsdóttur, prófessor við KHÍ.

Hún var m.a. ráðgjafi vegna stofnunar sérdeildar fyrir einhverf börn í Digranesskóla, vegna stofnunar sérdeildar við Myllubakkaskóla og um uppbyggingu á sérkennslu við Fjölbrautaskólann í Garðabæ.

Valgerður hefur komið að námsefnisgerð fyrir börn og unglinga, þýtt léttlestrarbækur, gefið út móðurmálsverkefni og unnið að því að námsefni fyrir ökupróf var lesið á hljóðsnældur.

Valgerður hefur sótt fjögur námskeið í Davis® námstækni. Fyrst hjá Sharon Pheiffer, og Laura Warren frá Bandaríkjunum, síðan hjá Siegerdine Mandema, frá Hollandi, og Richard Whitehead, frá Bretlandi. Hún hefur mikinn áhuga á að innleiða Davis® námstækni í íslenskt skólastarf. Að hennar mati er Davis® námstæknin mjög árangursrík námstækni fyrir öll börn.

Sérstök áhugamál

Valgerður hefur áhuga á ýmsu og þar á meðal hlátri og húmor. Hún er með alþjóðleg réttindi sem hláturleiðbeinandi frá lækninum Dr. Madan Kataria eiganda Laughter Club International á Indlandi, frá sálfæðingnum Dr. Steve Wilson eiganda World Laughter Tour í Bandaríkjunum og frá Dr. Francisku Munck-Johansen, sálfræðingi, eiganda Liv og lyst í Noregi.